茶餐廳手記（#1098）不合理鋤價的代理最後雙失

　　今日早上去到茶餐廳，有客人話今次捉到鹿唔識脫角，在過去一年，樓市低迷，睇啱幾個單位，打算買返嚟收租，於是搵相熟物業代理做嘢，點知代理話業主非常等錢洗，不但可以鋤價，而且可以鋤得很深，客人提醒代理，適可而止就好啦，最緊要買到，代理話唔使擔心，一定可以買到，結果買來買去，一個都買唔到，客人激到紥紥跳。

　　老闆話，在過去兩年，如果持有多個物業的業主到茶餐廳食嘢，大多數都是愁眉苦面，由於銀行將估值大幅降低，即是業主準時還款，從不拖欠，銀行依然call loan call到失暈，被迫要賣走一些優質物業，質素差些少都賣唔出，所有代理都知道業主有這樣的困難，如果他們有客，一些會鋤業主鋤到仆街，不過，不能夠話代理做得不對，但是，他們可能連自己都要付出代價。

　　現在仍然有錢買樓的人，他們已忍了很多年，今次是非好機會，如果不是銀行call loan，他們想買優質物業都難，但是他們不會阻止代理鋤價，試問邊度有人唔想買得靚，買得平，但是，他們忽略了一件事，即使被銀行call 到失暈，他們只要賣走手上三成物業，便可以解決問題，而且三成是上限，甚至兩成便可以，當業主達標之後，他們便會惜售，甚至比市價高兩成他們仍然唔會賣，到那時條，物業代理發覺，鋤價鋤得太狠，不但自己搵唔到錢，自己個客又買唔到靚嘢，可能連個客都失埋，所以，鋤價鋤得太狠並非好事，代理職責是促成交易，並不是鋤價。