茶餐廳手記（#1089）替人簽擔保如啞子食黃連

　　今早從澳門回來，中午去茶餐廳食飯，有客人話有朋友替人簽擔保，一向都相安無事，但最近買樓，申請按揭時銀行問有冇替人簽擔保，如果有要立刻取消，否則唔會批按揭，客人朋友於是要求友人取消擔保，誰不知對方銀行唔放行，現在都唔知點算。

　　老闆問我有冇替人簽擔保，如果冇又如何拒絕，我話很簡單，只要回覆話要問過銀行，得到銀行同意才可以簽擔保，否則銀行知道之後有權要求我即時還款，要求我簽私人擔保的人會立即褪軚，因為他們知道銀行是不會答應，我會話想簽但有心無力。

　　最近有一單輕資產事件，據悉有200人簽了私人擔保，他們不單止替自己簽，仲可能替別人簽，雖然有200人咁多，但傳媒冇辦法搵到一個人出嚟接受訪問，講解事件的始末因由，其實，非不為也，實不能也，如果他們接受訪問，即是話俾銀行知，在沒有通知銀行的情況下簽了私人擔保，銀行有可能立即要求他們還款，真係衰多二錢重，現在他們如啞子食黃連，苦不堪言都唔敢出聲，除此之外，他們都是專業投資者或者擁有令人敬佩的職業，如果畀人知道替唔相識的人簽私人擔保，面子損失比金錢損失仲大得多，所以，他們是不會出聲，傳媒亦冇辦法搵到一個人接受訪問。