星期一早上去到茶餐廳，有客人話，星期日一個豪宅發生火警，一女亡，一男一女危殆，有傳媒報導，那名男子從事地產行業，有劏場大王外號，問我是否有交流，我話名字我認識，但從未交流，簡單一句，「道不同，不相為謀」。
客人唔明白，好好地一個商場，點解要劏開百幾間賣，雖然或者會有錢賺，但十之八九，那些劏場就會變成一個死場，點解仲有人劏。
老闆話，那些劏場在未劏之前根本是一個死場，冇人流，冇收入，如果有穩定人流以及租客，根本唔會劏場，正
是劏就人死，唔劏就自己死，劏場亦是迫不得已做法。
現在有不少死場的劏場，在未劏之前，同樣是一個死場，業主花錢做裝修，劏開一百幾十間賣，滿足一些人買舖的人虛榮心，我曾經嘗試勸人唔好買那些劏場，得到的答案是只用一個車位的價錢，可以買一間舖，點解唔買，以後我唔敢再出聲。
有人質疑，那些劏場舖點解可以賣得出，真佩服那些物業代理，其實，買劏場舖的投資者大多數從投資其他物業賺了錢，手上持有現金又唔知投資乜，物業代理知道他們的情況，便會介紹劏場舖給他們，不但乾手淨腳而且又保證回報，何樂而不為，賺到錢而手上持有現金的投資者早已身痕，即使銀行唔做按揭，他們都會以full paid買，銀行唔做按揭反而救了他們，否則，就算賣了劏場舖仍然欠一身債。
