茶餐廳手記（#1035）香港算不算發國難財

　　今日早上去到茶餐廳，有客人話中東戰火愈打愈激烈，不但交戰國美國，以色列，伊朗各有損失，而且波及中東其他國家，尤其是有美軍基地的國家，當中受損最大的應該是阿聯酋，經營多年的杜拜已經成為世界第五，甚至第四金融中心，一日就俾伊朗炸散，不過，在杜拜的資金一定要流竄，不少人認為，來港的機會比去紐約倫敦新加坡為高，換句話說，香港是得益者，算不算是發國難財。

　　老闆話，香港是否發國難財言之尚早，如果戰事持續多幾個禮拜，甚至幾個月，在杜拜流出的資金唔會再返去，到時香港再計數有幾多資金流入，才可以確認香港是否發國難財，不過，按照現時情況，擁有那些資金的機構或者家族辦公室唔會遷去紐約倫敦瑞士，最大機會是去新加坡，不過，新加坡都有美軍基地，萬一伊朗發狂，攻擊全球美軍基地，新加坡就會受到影響，所以，資金流入香港的機會最大，甚至可以長期留港，所以，香港政府要創造更多投資機遇來吸引那些資金，否則，真係捉到鹿唔識脫角。

　　阿聯酋如果要怪，真係要怪美國以色列，杜拜作為金融中心已經經營很多年，才有現在的規模，想唔到只需一日就被美以拆散，如果美以不是斬首哈梅內伊，斬首後又不能速戰速決，估計伊朗不會攻擊美國在中東的美軍基地，更加唔會攻擊基地所在的國家，其實哈梅內伊算是溫和派，又可以壓得住其他主戰派，現在伊朗主戰派已經冇王管，有美軍基地的中東國家唯有自求多福，不過，戰事並不是由中國引起，所以，不能夠說香港發國難財。