茶餐廳手記（#1004）被升級都要自己主動拒絕

　　早上去到茶餐廳，聽到大家今日所講話題並不是格陵蘭，亦不是歐盟與美國會不會反目成仇，而是一則殺傷力甚大花邊新聞，有可能令到幾個問責官員離職。

　　老闆問，高管如果出差，坐飛機或者住酒店時被通知可以升級，又或者有回贈，應該如何處理。

　　有做高官的客人話，其實早有明文規定，被升級一定要上報，至於回贈，例如積分等，就要交返俾公司，自己袋了隨時可能被告貪污，航空公司以及大酒店全部都知道這個規定，所以，政府官員出差，是不會被升級，除非對方唔知客人是官員，但是冇可能會發生，因為機票或者酒店是由政府統籌訂位，對航空公司或者酒店來說，政府官員是黑名單，不但不能升級，甚至連小小免費額外服務都唔可以，冇事就冇事，有事就好大件事。

　　今次有政府官員到天津上任，在網上炫耀被升級至套房，咁就真係大件事，因為套房價錢隨時是普通房三倍以上，甚至連香檳都有，官員應該知道，香港人眼淺，咁樣炫耀一定會被人投訴，如果是個別事件還好，如果政府官員習以為常的事，就算法不責眾，但負責的問責官員亦有責任，最後甚至要辭職。

　　有一件事國內人不明白，他們以為香港的有錢佬好低調，其實，富貴若不還鄉，如錦衣夜行，香港的有錢佬都想高調，但是擔心被人起底，對自己做成影響，倒不如低調一些，還可以贏到低調名聲。