茶餐廳手記（#984）住得細可以推動消費

　　今日早上去到茶餐廳，聽到有客人話利息咁高，而自己住的地方又咁大，雖然已經Full Paid，但仍然覺得好浪費。

　　老闆話唔係浪費，而是奢侈，客人的子女已經出身，只是他兩夫婦與一個菲傭住一個2,000呎，市值大約4,000萬單位，住咁大間屋等於每日請客食大餐，不如轉換一間千呎，市價大約2,000萬的住宅，換屋之後，有一大筆錢可以投資或者消費，對香港也是好事，因為住細咗就有錢消費，住得大，能夠消費的錢就變了利息而揮發了，客人話極有道理。

　　老闆講得冇錯，如果年紀大了又不是與子女一齊住，最好換一間比較細的住宅，以前我提出過三間樓投資法，後來因為政府出辣招而變成不可行，三間樓投資法大意是一個在接近退休的人最好有大中小三個單位，如果與子女一齊住而又人多的話，梗係要住大單位，如果只得兩夫婦及一個子女，咁就要住中單位，如果只得兩公婆或者一個人，就一定要住細單位，咁樣才可以物盡其用，兩夫婦住細單位時，他們會發覺其他兩個單位的租金，會令他們消費得非常充裕，所以，當一個人年紀大了，應該住細啲，留返啲錢消費，有助香港經濟。

　　很多人都明白這個道理，但過唔到自己個關，因為大屋搬細屋，一定會有很多閒言聞語，我自己亦嘗試過，但不用理那些閒言閒語，只要諗住細咗，有多啲錢消費，可以推動香港經濟，就會開心很多。