茶餐廳手記（#965）香港茶餐廳點解咁成功

　　今日早上去到茶餐廳，老闆問我識唔識得太興陳永安，我話何止識得，太興仲係我們的租客，旗艦店是我們的舖位，交租非常準時，不時有人叫我們割愛，同事都唔捨得，那個舖位是我們重點保護的物業之一。

　　老闆問我知唔知陳永安已經過身，我當然知道，但對太興應該冇影響，在安少過身之前，太興業務早已交俾個仔打理，當大家擔心北上消費，太興2025年上半年純利由超過一千萬，大幅增加至超過四千萬，升幅2.8倍，真係勁。

　　有客人話真係好奇怪，香港茶餐廳點解可以做得咁好。老闆叫我講，我話只可以拾人牙慧，多年前的一個星期日，我在海濱長廊跑完步，一個人去中環太興食個黯然銷魂飯，加一隻鵝髀，見到陳永安同佢伙計，陳永安話，香港茶餐廳做得咁好，就是政府做了一項德政，不過，政府從來冇表達出來，這就是禁煙，如果沒有禁煙，現在最少有一半茶餐廳不會存在。

　　因為禁煙多一批女性以及不喜歡吸煙的客人，如果茶餐廳准吸煙，試想一想，枱面有一個污糟邋遢的煙灰盅，以及同枱客人吞雲吐霧，又點會幫襯，現在又唔同，乾乾淨淨，食物又好又快，所以就算有咁多茶餐廳都可以生存，甚至揚威國際，在外地的茶餐廳都標榜是港式茶餐廳。