星期一早上去到茶餐廳，雖然股市並沒有好似預期下跌千點，不過上下跌了過900點，算是一個小股災，但老闆心情甚靚，不受小股災影響，不斷請大家食新鮮出爐蛋撻，而且仲係放題，食幾多都得。
有客人問老闆點解咁開心，老闆話，可能受到股災影響，一向唔賣的隔離舖位業主，昨晚突然打電話俾佢，願意將舖位賣俾佢，不過就要高市價三成，不過，仍然比最高峰的時候低好多，老闆同意，並且在昨晚簽約，交了訂金。有客人話老闆買得貴，可以壓下價，老闆話，千金難買相連舖，尤其是茶餐廳是一個單邊舖，單邊隔離舖貴啲都要買，客人於是收聲。
其實，隔離舖位業主是幾個老兄弟，每一次講賣唔賣，只會不歡而散，有錢銀需要的兄弟一定希望賣走，
冇錢銀需要就會要價愈來愈高，今次難得兄弟同心，所以老闆立刻做決定。
今次匯豐買恒生，差不多所有分析員以及YouTuber 都話唔好，匯豐要替恒生冚債，其實我們只要睇整單刁究竟是折讓，抑或溢價，一般分析員只話賣得貴，即是單刁是溢價，匯豐一定睇好，否則就唔會俾溢價，還有，有消息指，在談判過程間，恒生提價三次，匯豐仍然追價。老實說，如果恒生唔好，匯豐點會追價，否則，倒不如等恒生壞帳浮現，股價大跌，隨時間用今日一半價錢就可以買到，不過，大多數分析員睇嘢都好負面，好似當日匯豐下跌至30元，被不少分析員口誅筆伐，話會跌至18元，但現在過百元，又冇人出嚟講，簡單一句，分析靠自己，信人如果輸咗就可以賴人。
