今早去到茶餐廳，有年輕客人話最近識到一個女仔，第一次約會大家傾得非常開心，仲話要有第二次，點知再約的時候，那個女仔請佢食檸檬，客人諗極都唔明。
老闆話知道點解，第一次應該係去好貴餐廳，第二次就去比較平民化的，很多時女仔見到咁嘅情況就會拒絕，不過都好，無謂浪費大家時間。
年輕客人話全中，咁樣應該點約才是最好，老闆話，與女仔約會好似食西餐，首先食開胃菜，然後飲湯，兩者相隔時間很短，飲完湯之後，侍應會掃下張枱麵包碎，然後上主菜，食完主菜隔一段時間就會問客人要唔要甜品，然後咖啡或茶，如果雙方交談甚歡，基本上會要埋甜品咖啡，否則就此打住。
一個男仔約新女仔，千祈唔好一開始就去大餐廳，應該去女仔屋企附近，大約十五分鐘路程的小型餐廳，
食完送女仔返屋企，老實說，第一次約會，女仔以及她的家人是非常緊張，如果能夠在兩小時內送女仔返屋企，一定會得到一個好印象。
打鐵就要趁熱，儘快約第二次，今次應該是跨區，去一些比較好，比較有特色餐廳，食完飯可以去飲杯嘢，再送女仔返屋企，去得幾次就要搞突破，甚至要一鎚定音。
食完開胃菜，飲完湯就要食主菜，一定要搵一間好的餐廳，文華廳都唔錯，不過就唔使飲香檳，食完呢餐，基本上大局已定，幾時食甜品就雙方默契，如果一開始就約女仔去大餐廳，然後去普通餐廳，女仔睇到荷蘭式拍賣約會，很容易請個男仔食檸檬，男仔在大餐廳用了啲錢就變成沉沒成本。
