茶餐廳手記（#892）這陷阱，這陷阱偏我遇上

　　今日早上去到茶餐廳，有客人大唱這陷阱，這陷阱偏我遇上，老闆問是否遇上電騙，如果係就唔抵可憐，咁大個人都唔識得應付，客人話唔係，而是明知是一個陷阱都要踩落去，都係唔抵可憐。

　　客人開財務公司，不是大耳窿，而是做物業按揭貸款生意，銀行受制於逆週期措施，對非自住物業最多可以借四成，就算偷雞都只可以借五成，客人的財務公司專做那些生意，銀行借四成，他借七成，一向以來生意都唔錯，還款都很準時，如果有人唔還款，他立刻會沒收物業，以銀主盤在市場發售，就算有損失都是小數目，如果已經收到一兩年高息，基本上是不用蝕本，但最近財仔客人手的按揭物業估價大幅下跌，不少債仔斷供，就算沒收物業，變成銀主盤之後出售，損失非常慘重，深究之下，原來財仔遇上了估價陷阱，今次真係這陷阱偏我遇上。

　　由於銀行對非自主物業只可以做四成，如果做五成，只能在估價提高，測量師亦知道銀行心意，例如將一個原本估值一億元物業，估高至1.2億，借四成亦只不過是4.8千萬，一半都唔夠，客人如果需要較多資金，可以考慮問財仔借，估價借七成亦相當正常，即是客人可以問財仔借8.4千萬，物業正式價值84%，現在住宅下跌三成，工商物業下跌四五成，按在財仔的物業資不抵債，而且一般來說，投資者不會用優質資產問財仔借錢，如果唔大幅減價，那些物業唔係咁容易可以賣走，令到財仔損失慘重，甚至要執笠，數字亦非常驚人，在七年前最高峰時有2490間財仔，現在只剩僅僅超過2千間，足足減少444間，老闆對財仔客人話，有咁多財仔一起中招，又點算這陷阱偏你遇上。