茶餐廳手記（#866）談判最擔心對方老闆突然出現

　　今日早上去到茶餐廳，有客人話今日有一個非常重要的談判，知道我身經百戰，咁重要談判最擔心是什麼，客人咁大頂高帽，唔回應都唔得。

　　我最初代表公司談判時，對手一定嫌我唔夠資歷，要與我的上司或者老闆談判，我叫他們唔好，因為我開出的條件老闆是不接受，我只是先斬後奏，如果他們要與老闆直接談判，我敢擔保，老闆的要求比我高很多，唔好講與我老闆直接談判，就算我們達成協議，都唔好見我老闆，否則佢臨時加價就唔關我事，所以，當我談判時最擔心是對方老闆突然出現，就算不打改動，最低限度都會攞個彩頭，如果是租約，就會攞多幾日免租期，唔俾又唔得，就算達成協議，對方老闆話嚟打個招呼，我都會立刻走人，費事佢加條款。

　　老闆話，日本仔就唔知道當中蹺妙，在關稅達成協議之後，與特朗普打個招呼，咁就大鑊，本來日本在美國投資4000億美元，利潤五五分成，就變成投資5000億美元，利潤一九，日本一，美國九，附加購買100架波音，這點算是協議，簡直是喪權辱國的條件，談判之前仲話用美債做談判條件，永不屈服，結果是如此條件，石破茂想唔下台都唔得，不過，在石破茂下台之後，任何人做日本首相，只會更加軟弱，以後任由美國唯所欲為。