茶餐廳手記（#845）銀行家原來是春江鴨

　　今日早上去到茶餐廳，有客人話一年容易又中秋，雖然未到中秋節，但咁又過了半年，上半年最難過就是擁有幾個物業的業主，被銀行call loan call到失魂，希望下半年可以抖下，銀行猛call loan，大家以為樓價下跌好多，但事實又非如此，上半年下跌1.2 ％，不少評論家玄學家跌哂眼鏡，當評論員話下半年樓市繼續下跌，已經有銀行家家人偷步入市買豪宅，正所謂竹外桃花三兩枝，東江水暖鴨先知，銀行家原來是春江鴨。

　　大家冇留意老闆，原來老闆不停用普通話接外賣order，停下來的時候老闆話，不一定要做銀行家才知道春江水暖，做茶餐廳都可以，銀行家見到有咁多內地人來港定居，開戶口甚至買樓，知道樓價上升有乜出奇，仍然講樓價下跌的人根本是順口開河，甚至只是個人的意願希望樓價下跌，所以銀行家買樓極之正常，不過，擁有負資產的銀行職員可能被迫賣樓，所以，見到有銀行職員賣樓先要了解情況，唔好立刻話銀行職員賣樓，樓價一定冧。

　　老闆話，近大半年到茶餐廳食早午餐的內地人愈來愈多，而且差不多全部都有工作，假日就大多數叫外賣，講普通話講到牙骹都梗哂，人口增加，樓價又點會下跌，更何況地產商現在都唔起樓，下半年樓價會有顯著升幅，大摩已經轉軚，香港評論員在自己地頭都慢過人，很難令人信服。