茶餐廳手記（#777）加至125%關稅，唔加好過加

　　星期四早上去到茶餐廳，有客人話中國跟隨特朗普將關稅加多50%之後，美國隨即將關稅提高至125%，只是加了21%，幅度不大，作用亦不大，甚至話俾中國知道自己冇籌碼。

　　老闆話，玩show hand的賭徒知道，籌碼只會愈推愈多，最後籌碼多的一方會叫show hand，唔會縮返落去，因為咁樣做會俾對方知道自己冇籌碼，變成自己show自己hand，在今次關稅戰之中，美國明顯佔上風，中國只能跟，不能反大，否則就會俾機會美國向自己show hand，如果美國唔想show hand，最好辦法就是封牌，即是雙方繼續等，直至有一方捱唔住，或者在期間雙方協商解決，今次加21%，代表特朗普慫了，中國不用跟，等就是最佳解決辦法，等的意思並不是美國或者中國政府等，而是兩國人民等唔等得，如果因物質短缺而出現動亂，想等都唔得，一定要主動降低關稅，老闆話唔敢猜測中美雙方那一個最先降低關稅，不過，如果中國主動降低關稅，以後就抬不起頭，任由美國宰割。

　　有客人話，美國唔俾中國等，美財長話不排除將在美國上市的中概股剔除，財長咁樣做即是承認特朗普已經冇籌碼，佢要幫拖，不過財長唔知道自己幫倒忙，財長可能唔知道，在美國上市的中概股早已有心理準備，有部分早已在港交所上市，今次美財長幫了一個大忙，在美國上市的中概股要考慮是否撤出美國，今次港交所想唔發都唔得。