茶餐廳手記（#774）Costco 會不會缺貨

　　星期一早上去到茶餐廳，有剛從美國回港的客人話今次大件事，當地市民擔心加關稅之後，民生用品價格大幅提升，於是一齊搶貨，連Costco都話部份貨物缺貨，尤其是紙巾，不過，他並不明白，總統特朗普先生表示，關稅是由生產商負責，應該唔會影響售價，點解要搶貨。

　　老闆話客人唔知道逢商必奸，逢屍必艷的道理，生意人話缺貨，即是加價先兆，而且仲大條道理加價，零售商是否缺貨，真係要問他們才知道，不過，Costco話缺貨，打亂了特朗普部署，因為他曾經講過，關稅是由外地生產商負責，對零售價沒有影響，但市民並不相信，所以才會搶貨，如果稍後Costco在補貨之後大幅加價，搶貨的情況會更加嚴重，同時亦證明特朗普所講，關稅是由外地生產商負責是不實的，不過，不用擔心特朗普，他已經搵定人孭鑊，一個現代版的暫借人頭一用。

　　在特朗普推出關稅之後，美國財長話關稅政策會堅持到底，同時叫被美國開徵關稅的國家或者地區唔好報復，現時關稅已經是上限，未來有下調空間，財長替特朗普保駕護航，但難敵市民雪亮的眼睛，美國人民知道，殺頭生意有人做，蝕本生意冇人做，美國買家殺價已經殺得好犀利，普遍毛利率已經非常低，如果再要他們負擔關稅，將會蝕大錢，既然如此，不如唔做美國生意好過，供應減少，美國零售商一定大幅加價，又有可能俾到生產商要求的價錢，但結果始終是美國商品大幅加價，特朗普唯有暫借財長貝特森人頭一用，所以才有消息傳出財長打算辭職。

　　有客人問，美財長辭職之後，特朗普會不會暫緩關稅，老闆話唔知道，或者是一半一半，咁即是答咗等於冇答。