茶餐廳手記（#743）好似兩餸飯的賣地政策

　　昨日早上大家在茶餐廳談論最新財政預算案的時候，有客人話覺得唔妥，但又講唔到是什麼唔妥，正當此時，有人入茶餐廳問唔想食ABC早餐，可不可以阿啦卡(單點)干炒牛河，老闆話冇問題，不過就冇優惠，咖啡都要俾正價，客人亦同意，做生意就是如此，什麼都可以傾，大家同意便成生意。

　　不過又不是所有的食肆都可以叫阿啦卡，現在大熱門的兩餸飯店就不可以，客人可以從食物櫃揀任何兩餸三餸甚至四個餸，但就唔可以叫食物櫃沒有的食物，幫襯的人都知道，所以，從來沒有客人在兩餸飯店阿啦卡。

　　財爺最新的財政預算案，相信大部分人都滿意，因為財爺從善如流，所有問責以及高級官員，立法局議員等，今年全部凍薪，而赤字亦只有872億，比預先估計的千億財赤有兩成折讓，而且明年會下降至620億，雖然預算案整體唔錯，但對於財政來源之一出售土地就略嫌不足，直接講一句，就是好似一間兩餸飯店。

　　政府今年會推出八幅土地，就好似兩餸飯店只有八個餸，如果有人幫襯，就只能在這八個餸之中揀兩個，如此類推，地產商如果想買地，就只能在這八幅土地中尋找，沒有阿啦卡，其實，政府何不考慮勾地，任何土地都可以賣，只要地產商出價符合政府要求，政府可以推出那幅土地拍賣，當然是價高者得，就算冇其他人出價，勾出土地的地產商就要買下那幅土地，老實說，出現財赤就即是窮，窮就要變，變就會通，如果兩餸飯店冇生意，隨時會接受客人阿啦卡。