美英加澳紐自稱為五眼聯盟。話就話五眼，其實是A眼美國話事。有人話，五眼聯盟好似笑傲江湖中五嶽劍派，同氣連枝。我認為唔係，最多可以話連枝但不同氣。
今日中午有老友買了燒鵝到公司與我一起午餐。
在抗疫時，可以唔去餐廳食飯就唔好去。老友話美國政府要英國電訊商清除華為設施，B眼英國唔敢反抗。不過，就要所有電訊商在2027年前清除，即是兩次奧運。兩次世界杯之後的事，到時世界是不是由A眼話事，將會是未知之謎。
較早前C眼加拿大為了應酬美國對香港推行港區國安法不滿，對香港實施軍用器材禁運。原來每年只2萬加元，不少人笑到開巷。其實，小杜同約翰遜都使出同一招來應酬美國。岳不群絕技，叫陽奉陰違，美國佬都畀BC玩謝。
E眼紐西蘭女總理繼續與漁夫男朋友去釣魚，寄蜉蝣於天地，費事理特朗普。D眼澳洲激嬲中國，除了中國唔買澳洲農產品外，澳洲佬有多少心脅：要同美國買幾艘戰艦壓驚，冇收入之餘仲要支出。澳洲總理都可以說斯人獨憔悴。
