禁酒令實施前最後一杯

　　星期五下午，幾個老同學話很久沒有聚舊，不如趁禁酒令實施前飲番杯，一定好味道，我話冇問題。不過，應該在解除禁酒令第一杯更加好味。

　　四人坐低，四杯大啤，自然有話題，有老同學話唔知道是否我連發數文講匯豐唔派息，匯豐大班祈耀年最終都出信向香港人致歉。這是前所未有的事，匯豐大班一向當香港人是蟻民，七成幾收入是由香港提供，但七成幾支出就去了歐洲。我認為匯豐出信是向平保致歉，出信理由是因為惠譽降匯豐評級，出信目的是希望香港人唔好搞什麼追討聯盟。雖然一定追唔到，但多一事不如少一事，尤其是在這疫情肆虐時間，大家一齊抗疫好過。

　　老同學問我是否因這件事很煩，我話除了煩之外還有多少心驚。兩年前寫過一篇短文講匯豐，竟然畀人挖出嚟大做文章，不但報章記者，連TVB東張西望，有線財經都追問。不過，這絕對冇問題，但在Facebook 畀人惡搞就好冇癮。有同學話，那些回應唔啱睇刪咗去，人哋激氣好過自己激氣。我本來唔想，但很多回應已經太過份，同埋涉及家人，所以，冇辦法都要出此下策。其實，我出文的意思是將我的人生經驗講畀大家知道，當中當然有一些虛構人物，或者故事，大家不必太認真。幾位老同學話聽到我咁講就話放心，驚我對那些回應太上心，現在約定在解除禁酒令大家又再一起吹水，到時候應該唔止四位同學。