上星期六與一班投資界精英去横琴睇樓，在未過關時大家
都滿懷心事，不欲多言。因為有傳聞話有不少人在過關時被打回頭，就算沒有去參加遊行，但很容易被人點錯相，入唔到國內就唔想移民都唔得。過了關之後大家都唔同哂，在午餐時有同行友人問點解唔見香港地產商地盤，我話以前有很多，但猛虎不及地頭蟲，走得就走，被淘汰的被淘汰。現在香港人要在國內買樓，唯有幫襯國內地產商。
在1993年，朱鎔基總理宏觀調控之前，有不少香港人在國內做地產商。不過他們都是業餘，大多數香港地產商都是在國內設廠，與當地政府合作起樓，打算賣俾香港人，但結果不用多說，十個之中有九個失敗，甚至連工廠也輸掉。當時我們也有在國內做地產商，在一次晚飯，我問合作夥伴打算怎樣處理公司盈利。佢可能飲了不少酒，隨口話會將盈利調到香港投資，我收到這個訊息之後便部署離開，將資金調回香港發展，百川匯聚，香港樓價想唔升都難，無理由還要留在國內發展。不過，我隔了廿多年才說出來，當時有人問點解我們不繼續在國內發展，我話太多應酬，頂唔住。
