昨日，我發表了一篇文章，話法國總統大選，極右派或者本土主義者馬琳勒龐會贏，之後收到不少電話及短訊，大多數是不同意我的說法，而且有人話，我的「細價樓爆煲論」極不準確，叫我無謂做什麼預測，我只不過好彩買了一些物業，賺了錢，現在胡言亂語，我覺得這是人身攻擊，無謂回應。
其實，我做預測只是個人興趣，而且只是從某些觀點作出預測，不但沒有科學根據，學術性不高，市井之徒就啱睇，三年前世界杯，經濟日報請我寫「以波論樓」，編輯問我那一個國家會取得冠軍，我話德國，大熱西班牙會在分組賽出局，理由就是德國必入四強，六倍賠率簡直是送錢俾人使，於是我用稿費買德國，贏了幾十萬，至於西班牙，每一位球員都打各地聯賽最好的球隊，除了本土聯賽之外，又要打歐聯，全部都打到殘，怎會有表現。
去年，東方日報同馬會請我評論歐洲國家杯，我揀一隊，如果一直贏，我一直可以評論，我話葡萄牙會贏，打一個C朗就夠，及後，有不少朋友話在投注站見到我講歐國杯，咁奇怪。
英國脫歐投票前十日，英國政府請索羅斯游說英國市民不要選擇脫歐，我睇到之後就知道大鑊，於是撰文話英國有很大機會脫歐，英國政府是知道，所以才臨急臨忙搵索羅斯幫手，其實英國政府搵錯人，索羅斯形象不佳，大家都知道他是奸仔一名，幫倒忙就真。
美國總統大選，我一直留意特朗普行軍策略，他一直示弱，辯論又輸，令到希拉利掉以輕心，只是不斷以誹聞攻擊特朗普，到臨近大選，特朗普發表治國之策，希拉利才如夢初醒，本來是穩操勝券，最後被特朗普偷襲成功，但美國人沒有選錯，如果今日再選，特朗普會大勝希拉利。
