好彩去年冇買樓

　　2016年只不過過了大半個月，好多人見到我就會講，好彩去年冇買樓，當中有不少人承認是因為睇了我的「細價樓爆煲論」，不過，他們亦講，在最初幾個月，見樓價屢創新高，又聽到物業代理講，今日新高，明日新低，當時是非常憎我，老實說，他們亦知道地價貴，建築費又貴，就算地產商唔賺，樓價都冇得平，亦唔知點解我可以話細價樓爆煲，不過，見我過去幾年預測樓市都幾準，話跟紅好過頂白，哈，同我講賭，講三日三夜都講唔完。

　　香港樓市已經升了很多年，要買樓的人早已買了，未買樓的人早已立心不買，就算樓價下跌一半他們亦不會買，除非講明一定會賺，有能力而未買樓的人其實不多，或者會有一些心大心細，在買與不買之間，總之，那些在去年沒有買樓的人今天就很口響，不過，他們當中有些人可能忘記，去年曾經指責我發表爆煲論，令金管局收緊細價樓按揭至六成，剝削他們買樓機會，今日，英明神武的當然是他們。

　　在2015年，二手樓成交量慘不忍睹，如果我同人講這是好事，一定會被人鬧到反肚，其實，真的是好事，成交量偏低，即是並未有太多人買樓，他們除了避免損失之外，購買力亦可以保存，今年或者明年，如果那些人有信心以及夠膽的話，他們就會買樓，成為樓市下跌時的防線，但如果他們在去年已經買樓，市場上不但失去了那些購買力，他們當中有部份人可能被迫賣樓，令樓價進一步下跌，所以，好彩他們在去年沒有買樓，但希望他們能夠在今年或者明年買樓，將本來已用的購買力重新啟動，不但可以做白武士，支持香港樓市，亦有機會令他們擁有的資產升值，幾時可以買，今年以後到明年底，隨時都可以，啱價就可以。