買靚樓之貪新棄舊

　　今年以來，有人問我買樓的意見，我除了叫他們多等兩年之外，如果一定要買，就一定要貪新忘舊，買新樓，唔好買二手細價樓，理由很簡單，因為大多數新樓與同區二手細價樓同價，甚至低於同區二手細價樓，元朗新樓盤就是最佳例子，有人話，新樓管理費比舊樓貴三成，我有多少懷疑，因為在以往，地產商會補貼，做成新樓管理費比二手樓平，現在可能改變策略，不過，都是一分錢，一分貨，新樓的配套設施比舊樓多，收費多些亦是合理。

　　有人話，新樓盤在剛入伙時爛茸茸，要忍受一段長時間才可以有舊樓的居住環境，我相信講這句話的人未試過住新樓，現在一般新樓盤入伙，基本設施已經全部可以用，業主可以不用裝修便可以入住，而且有保養期，有什麼不妥可以叫地產公司執妥，就算業主願意花錢裝修都唔會好得太多，倒不如慳返一筆錢仲好，但如果買二手樓，或多或少都要花一筆錢裝修，現在大家經常聽到建築費要四千元，其實是包裝修費，還有那些重型設備如中央冷氣系統，升降機等，使用年期新樓一定會比舊樓長，更何況還有保養期，所以，那些說舊樓比新樓好的人，我不知道他們的理據是什麼，如果在同一區域，新舊樓同價，就一定要貪新忘舊。

　　如果已經有一層自住樓，但又買了新樓，就要採取貪新棄舊，立刻打一個單擋，將自住舊樓賣走，否則，到入伙時仍然有兩個物業，就會發覺，新樓借唔足，舊樓賣唔郁，非常煩惱。