在年初的時候，有年青朋友打算買新樓，打算入多幾張飛增加勝算，問我識唔識得一些物業代理可以替佢入飛，出錢又出力個隻，我同佢講，叫代理出錢入飛是違法的事，最好不要做，而且佢打算買樓，表示四成首期已經準備好，如果所買的新樓是500萬，即是有200萬現金在手，地產商要求10萬元一張飛，他有足夠的金錢入20張飛，但法例所限，一定唔可以入20張，有人計算過，每一個打算買新樓的人，用盡一切辦法，最多可以入6張飛，只不過是要60萬，對於那位年青人來說，一定可以應付，何必要攞物業代理小便宜，就算有物業代理不怕違法，肯出錢出力替客戶入票，成本都相當高，所以，代理行對於那些客戶的態度，都採取一個拖字訣，如果手上有足夠認購額，索性對客戶說銀行打唔切本票，叫客戶自己打，否則，就不能夠替他入飛，到那時候，那些打算買樓的人可能已經打唔切本票，而白白損失了機會。不過，那些客戶多數一早預了攞小便宜心態，是不會多買本票入飛，最後，眼白白見其他人抽到，而自己又抽唔到，他們或者不知道，如果唔貪小便宜，他抽到的機會就大得多。
最正確做法就是同相熟的物業代理商量，計算可以入幾多張票，自己去買本票，就算代理話可以代勞都推卻，兼說聲多謝，抽到的機會都會大一些，有時候，買靚樓要從小處著手，今次就是勿貪小便宜。
