「細，小」確認樓市跌勢

　　有人曾經問我，點解可以咁大膽肯定，樓市跌勢即將出現，但又唔准我用供應增加，利息趨升，經濟放緩，辣招稅等四大因素，因為那些因素大家現在已經耳熟能詳，了無新意，於是，我又講故仔，話說二次大戰後期，盟軍在諾曼第登陸，解放巴黎之後，長驅直進，主帥艾森豪威爾將軍發覺德軍在撤退時所留下的重武器愈來愈少，已經很少見到虎型坦克踪影，而俘獲的德軍的年齡則愈來愈輕，甚至只得十四五歲，於是下令全軍全速前進，可惜，盟軍始終有一個制度，法國佬見搞定巴黎，戴高樂已經唔想再打，英國佬解放巴黎就沒有問題，揮軍進攻柏林，蒙哥馬利始終猶疑，只得巴頓一路奇兵，左跑右跑，做前鋒係佢，去救人又係佢，當盟軍其他將領認同艾帥判斷時，蘇聯朱可夫元帥已經到了柏林。點解盟軍其他將領唔相信艾帥，只因為他的理由太簡單，艾帥話，德軍沒有重型武器留低，即是準備隨時放棄防守，年齡趨輕，即是預支了未來兵力，將無以為繼，從「細，小」，可以知道德軍很快就會潰敗，所以，應該提高行軍速度，直搗柏林。

　　講完故事，回歸現實，在較早前，出現了不少「耀母揚威」事件，那些二十出頭的少年帶著阿媽去買樓，還大言不慚講由阿媽支助，其實已經預支了購買力，到最近，有父母竟然話買樓給三歲小兒，買樓的人愈來愈年輕，購買力又何以為繼。地產商亦知道稍為大型的單位是很難出售，唯有將單位劏細，希望能夠吸納剩餘購買力，如果艾帥睇到，回想德軍當日情況，就知道香港樓市在潰敗中，我亦有同樣分析，所以，就算指數再創新高，單憑「細，小」，就已經可以確認樓市跌勢，而現在形勢最危急的，就是龐大供應量才開始，未來三年，供應源源不絕，樓市是否有危機，相信不用我明言。我問那人明唔明白，佢話佢唔係主修外國史，唔知道我噏乜，指數還是創新高，樓市有什麼危機。