昨日，蘋果雞乸咁大隻字話我認輸，講得冇錯，我真的是認輸。日前，亦有評論員話我的「細價樓爆煲論」被人當作笑柄，我只是很奇怪，在過去幾年，都唔知道有幾多評論員，經濟學家話樓市大跌，連冰河時期都出埋，又唔見他們被人當笑柄，我的爆煲論在各方反對勢力力撐之下，樓市沒有下跌，我認輸，但並不服輸，既然認輸，又怎會被人當笑柄，大把人去澳門賭錢輸到焦頭爛額，但只要他們認輸找數，不但不會被人當笑柄，而且還將他們當上賓招待，更加希望他們能夠輸完又嚟賭過，我認輸，8月14日在福臨門已訂十圍，咁樣做都會被人當笑柄，似乎不合情理，如果我當冇件事，被人當笑柄就無話可說。

　　去年我話樓市先穩後升，有評論員唔同意話樓市必跌三成，到年尾，那人不但不認輸，還對我說，樓市預測只不過隨便說說，如果我認真就是輸了，又係我輸。有時我都幾服林一鳴，從來沒有一句挖苦的說話，贏都要贏得有風度，不過又唔明白佢話我出風頭，是我發表「細價樓爆煲論」在先，林一鳴連隨反駁，話當時買樓好過六個月之後買，如果我唔表態，我的「細價樓爆煲論」便失去意義，林一鳴情況同他的老闆一樣，明明證監會查數，佢老闆話冇件事，證監唯有表態，好似今日仲未復牌。

　　以前，霍英東做東昇球會的班主兼球員，經常告誡各球員，贏波都要贏得有品，贏的時候唔好玩人，輸的時候唔好打人，是輸打贏耍，不是輸打贏要，如果輸的一方對贏的一方說認真便是輸了，我覺得簡直是冇品，連輸打贏耍都不如，輸都要玩人。

　　很久以前，曾經有人問我，什麼人最有風度，我可以肯定地說，認輸的人最有風度，認輸的人在理論上仍未輸，但是大勢使然，始終都會輸，何不早一些認輸，而我又明知道在任何情況下，顯示樓市的指數都會上升，股市升，分析員表示股民在股票賺了錢而買樓，所以樓價升，股市大跌，佢又話國家暴力救市，樓價一樣升，既然如此，何不早一點認輸，現在我是無條件認輸，又點會被人當作笑柄，笑我的人似乎欠缺一點風度。