沒有雞粥賣的強記

　　我寫完了一篇「老巴剎」，有不少老友對我說，在星期日可不可以寫一些遊蹤，或者介紹一些有特色食肆，老友講就容易，其實做的確很困難，因為現在旅遊，飲食雜誌多不勝數，他們有專業團隊負責搵料，策劃，而且由一些着名食家執筆，我講飲食，一定會俾人笑到面黃，但我想起六七年前開始寫文章時，最初一樣俾人笑到面黃，後來寫得比較好一點，又有人問我有沒有請代筆，所以，我對老友說，有機會一定會寫一些關於飲食文章，今次寫強記，不過不是沙田大圍強記雞粥，而是一樣是賣粥，不過是賣豬骨粥的強記，而大圍強記，除了它的雞粥出名之外，老闆仲出名，在佔中時期，老闆用糞便淋金主，我估計，大家都可能忘記。

　　今次講的強記位於灣仔馬師道，洛克道交界，原址是新同樂，重建之後變成一幢乙級商業大廈，地面有幾個舖位，強記佔其中一個，大約七八年前，我與老婆行經上址，見到有舖頭賣喳咋，老婆食喳咋，我食豬骨粥，兩樣都非常好，我試埋糯米飯，腸粉等，全部都唔錯，如果叫我評分，糯米飯就最好，不過就好貴。有一晚，天寒地凍，老婆話想食喳咋，我又想食糯米飯，於是揸車去強記，食完糯米飯再買喳咋給老婆，當我食糯米飯的時候，見到一個物業代理，我問他業主賣唔賣這個舖，佢話賣，不過要連其它幾個舖位及一，二，三樓一起賣，要價億二，我問有冇價講，佢話冇，我話減十萬得唔得，物業代理相當豪情話，業主唔減，佢減，返到屋企同老婆講，買喳咋變成用億二買舖位，我老婆冇食喳咋。

　　強記的食物唔錯，但有一個壞習慣，就是經常不開門做生意，他們一家人感情非常好，經常一起去旅行，又打麻雀，如果打得太累，索性唔做生意，一個月開門營業一定唔夠二十日，我曾經叫同事勸籲他們，經常唔開門做生意，即是有加價空間，他們唯唯諾諾，但行為就沒有改變。前幾日，收到幫我買入那些舖位的物業代理一個電話，問我可唔可以食碗糯米飯，我略過所有步驟，直接問，幾多錢，他說大約六億，我回答話，問一問老婆先。