新樓銷售好，樓市唔會差

　　有老友問，樓市幾時會反彈？ 以什麼作為指標？ 我話，最簡單就是要睇新樓銷售情況，如果新樓滯銷，樓市想反彈都難。不過，大家又睇唔到新樓滯銷，因為發展商見到新樓唔好賣，是不會將新樓盤推出市場，所以，當新樓銷售數字低於正常水平，代表樓市情況不樂觀，不過，發展商是不會講出真相，他們只會話睇好後市，所以惜售，當大家聽到惜售，就唔好咁快入市，因為發展商總有一日不會惜售。

　　雖然在年初時，有不少分析員、玄學家都睇淡樓市，但今年新樓銷售反而上升，而且升幅驚人，今次首三季銷售量超過1.5萬個單位，與去年首三季相若，估計今年衝破兩萬個單位，亦不出奇，如果情況實現，代表樓市已經反彈，而事實上樓價早已反彈，最新樓價指數比年初升了3 ％，所以，到今年底，今年樓價上升5%甚至更高亦不出奇。

　　很多人唔明白我點解話新樓銷售好，樓市唔會差，點解唔係二手樓，原因是新樓代表新供應，如果不消耗新樓供應量，庫存愈來愈多，終有一日壓跨樓市， 現在新樓銷售好，而且發展商亦放緩建樓速度，未來三至四年潛在供應量已經下跌至大約10萬個單位，只要下跌至9.3萬至9.4萬個單位，樓市求過於供情況就會出現，當樓市求過於供，樓價又點會唔升。