今早去街市，行過新鮮雞檔見老闆悶悶不樂，以為生意唔好，老闆話雞檔生意好到不得了，但有傳媒報道，綠置居半價都賣唔哂，他的收租單位一定貶值不少，所以悶悶不樂，我話根本是兩件事，綠置居又點可以同私樓比較，老闆話都是住宅，有乜唔同。
我都唔知點解釋，好彩啱啱有一個人行過，佢話啲雞點解咁貴，要240元一隻，前面間舖賣60元一隻，老闆話痴線，60元隻是冰鮮雞，佢賣的是新鮮雞，兩者都冇得比較，講完之後老闆話明白點解綠置居唔可以同私樓比較，就算是私樓半價仍然太貴，因為綠置居要放棄購買者的公屋單位，甚至要補地價。
老闆明白就好，一向以來，政府賣公屋居屋都是以七年樓齡的私人樓宇作為指標，居屋大約七折，綠置居大約半價，今次綠置居唔好賣是因為單位太細，但傳媒則報道，綠置居半價也冇人買，令人誤會香港樓市很差，以為樓價下跌了一半，但我又唔信傳媒夠膽將冰鮮雞價套在新鮮雞，話雞價跌了三分二都冇人買，雞他們識，樓他們唔識。
