有一個老友每次見到我都會問我點解唔賣樓，全香港的專家，評論員都會話樓市下跌，有分析員甚至話樓市會下跌兩成，我話現在話樓市下跌，就好似在風口上，豬都可以飛起來，求其搵一兩個理由話樓市下跌，都冇人可以反駁，現在賣樓的人反而要注意一件事，就是盡量避免其他人誤會賣樓是因為財困，如果被人誤會，朋友都會疏遠一些，如果被銀行知道，可能會收緊信貸，無端端自尋煩惱，如果不是等錢用，現在最好不要賣樓，至於幾時賣，可以等
樓市好消息滿天飛的時候，到時候不但可以賣到更好價錢，又唔會畀人誤會財困，不過，當好消息滿天飛，今日劈價賣樓的業主又唔捨得賣。
我知道那位老友是一個勞力士收藏家，收埋不少勞力士限量版，並且經常對人講，收藏勞力士是最好投資，有得戴，有得威，而勞力士又不斷升值，近日勞力士跌價，當然唔會提，我問老友勞力士仲會不會跌價，老友話唔肯定，但在經濟環境未明朗之下，有不少勞力士收藏家因財困而要賣走手上部份勞力士，價格有很大機會繼續下跌，我話既然知道價格繼續下跌，點解唔賣走手上勞力士，等跌到某一水平再買返，又唔使俾辣招稅，老友話點可以賣，一放聲氣賣勞力士，大部分朋友立刻走頭，現在不但不賣，如果見合心水，仲會買多一兩隻，我話老友就唔公道，自己唔賣勞力士就叫我賣樓。
