有老友話有一個朋友打算賣樓，問佢有冇興趣，我話最好不要同朋友買樓，否則就好似兩個人對賭，樓市上升即使賣家輸了，樓市下跌，買家一定會唔開心，不過，如果朋友有需求，而自己有用得著，同朋友買樓亦無妨。
老友亦抱住這個心態同朋友傾買賣，點知一肚氣，業主叫價竟然比市價高兩成，老友都唔知點樣還價，因為如果
減價超過兩成，一定會被朋友話鋤價，更何況朋友早已表示，雖然睇唔好樓市，但絕對不會減價，就算是朋友最多都是減2-3％，老友知難而退，連價都唔還，點知業主對其他人講老友賣唔起，真係激到老友扎扎跳，才記起我話唔好同朋友買樓，買得成就是對賭，買唔成就會比人話買唔起。
如果問任何一個業主賣樓的理由，移民加息都是其次，更加唔會話自己財困，最多人話是睇淡後市，其實，睇淡後市不是理由，點解睇淡後市才是理由，問題是，既然是睇淡後市，那些人叫價應該低過市價，但事實又非如此，那些業主雖然睇淡後市，但叫價又高過市價兩三成，所以，我們經常見到一些劈價兩三成的個案成交，但成交價竟然與市價相若，由此可見，那些睇淡後市而賣樓的業主口是心非，個口講睇淡後市，要價又高過市價兩三成，如果真係睇淡後市，首先要身體力行，要價低過市價，否則，唔好同人講話睇淡樓市而賣樓。
