果然是反高潮，首置上車盤吹到咁行，點知林鄭只係有1000個單位做先導計劃，
細節完全欠奉。
要知道首置最重要關節在於點處理補貼問題，轉讓有什麼限制，如何避免成為免費午餐，又唔會令首置變成夾屋，跌市時令業主焗輸。冇自由市場嘅置業安排，需要超級智慧同強大政治能力，仲要市況配合，先做到成績而唔會爛尾收場。一啲細節都冇，證明林鄭都未諗掂點搞，同地產商都未傾掂數。
又或者，首置的確有如市場預期，未益中產先利地產商，所以唔想主動由佢一手一腳提出，最好先由土地供應專責小組，大辯論之後得出加快農地補地價會係增加土地供應嘅社會共識，有呢個擋箭牌先至搞公私營合作，咁就唔可以話佢官商勾結。明年中先有細節，明年底先用農地補地價，有足夠時間畀專責小組做嘢。首置是否就此完結，未可以咁早定案。
綠置居、白居二恒常化係今次《施政報告》比較實在嘅方向，但呢兩樣置業方法都係梁特提出，即是代表林鄭都冇梁特咁好計，再諗唔到新橋去解決房屋問題，只可以繼續追隨上屆政府嘅方法。但係綠置居同白居二如果係可以解決房屋問題，咁梁特一早就可以完成任務，唔使林鄭出嚟沿用舊橋。
綠置居其實係叫公屋富戶買入公屋長期居住，正路應該係叫有能力嘅公屋居民出去居屋甚至私樓市場，等公屋資源可以留畀有需要嘅人。綠置居係讓部分公屋居民可以永久住公屋，排隊上公屋嘅人照係排長龍，沒有改善草根階層住屋問題。
白居二證明會推高居屋售價，引發樓價連鎖反應。38萬間居屋就算可以一次過推晒出嚟白居二，市場都唔會突然多咗38萬間二手樓供應，賣咗居屋嘅業主都要搵屋住，賣咗居屋嘅走去買私樓，居住條件隨時差過居屋。
白居二食咗一啲私樓首次購買力，又釋放咗啲換樓購買力，對樓市又有什麼影響？咁多公營房屋新花款，只係將件蛋糕打橫打直切嚟切去，但要食蛋糕嘅人冇少到，件蛋糕亦冇大件咗，咁樓市同以前有乜分別？房屋問題，林鄭唔見得比梁特有計，期望新政府可以解決呢條千古難題，冇可能。
