「方帥，你話買樓發達易過買股票，又話靠股票發達可以唔使本，講多兩句教吓我吖。」
「草蜢仔，我識鬼。我識就唔使坐喺度同你吹水，我見人哋咁叻，我都想有人指導吓我。有本事發達嘅人，必定係聰明人。如果蠢人都可以發達，呢個世界仲有窮人？你聰明嘅，使鬼人教；你蠢嘅，教你都學唔曉。
「不過話時話，大家都係聰明人，靠樓同靠股票嘅人好唔同。股票係紙一張，張張都一樣，只係上面印嘅名唔同。樓就間間都係獨一無二，沽一間少一間，買唔番一模一樣。所以靠股票嘅人，唔會係儲物狂。反而揸到一手靚樓嘅，會錫貨唔沽。一個經常買買賣賣，另一個就善價而沽。樓市一個周期入面，股市可能已經上落10次。買樓嘅捱一個浪，買股票嘅要經過10次起跌，梗係股票輸番轉頭嘅機會大啲啦。」
「咁即係話捱得過咁多起跌都唔死得嘅股票佬最聰明啦！」
「最聰明唔敢講，最睇得化就一定係。草蜢仔你呢一行，英年早逝嘅見唔少，曇花一現嘅大不乏人，轉型失敗嘅亦有。聰明到極點就係睇化晒，到最後唔會再用錢去博，反而但求穩陣。買股票發達嘅，最後收山走去做放數同地產就最穩陣，留到自己份身家。你咁後生，博多十幾年先諗都未遲，至怕冇十幾年俾你慢慢玩。」
「點解？唔係咁快冧市啩？」
「唔係市冧，係你就嚟冧，唔夠人爭。以前發達靠勤力，靠食腦。將來發達，要靠本。以前啲人勤力，走多步，就係要知得比人多。再加上用腦，諗到人地未諗到，咁你就有機會發達。而家嘅世界咁快咁透明，你好難知得比人快比人多。用腦嘅人一街都係，你好難搵到機會跑贏隔離。相反，而家最令人有競爭優勢嘅，就係你有冇本。有本，等於有張入場券，可以有機會俾你去選擇機會。
冇本嘅，捉到鹿都脫唔到角。將來你同人工智能競爭，佢知嘅嘢多過你，諗嘢快過你，唯一你有佢冇嘅，就係資本。以前啲人話，人生最大嘅投資就係投資響自己身上，而家我話最大嘅投資，就係要盡快諗計累積資本，千祈唔好攞啲錢去學呢樣讀嗰樣，到頭來連個本都輸埋。」
「嘩，方帥，我諗到計搵到個本，就唔使問你啦，嘥我時間。」
