去年8月他透過代理行及網上平台放盤，最初叫價600萬元，「當初放盤叫價都叫得高，標價600萬元反應都多，就算擺啲咁嘅價，都好多代理打嚟問喺咪放盤？」、「好多人嚟睇樓，日日都有好多電話，好多嘢問，好麻煩！睇樓啲人多，但真喺會落實還一個價畀你嘅人喺好少……有10個8個睇過樓，但反應就唔太好，睇完可能無還價就走咗啦！」第一次賣樓感受到：「原來賣樓唔係我一擺上網就有人要。」擔心賣不出？他表現淡定地說：「唔喺驚賣唔出，喺驚賣唔到我想賣嘅價！」經紀話他標價600萬元是不切實際。

放盤一個月只聞睇樓客，不見有價還。8月底將叫價下調至570萬元，其後回歸現實將叫價再下調至550萬元，叫價放軟，即有實客。9月5日他透過whatsapp回覆：「有個客還價520萬，原本又話525萬。我還價540萬，佢話買510萬嗰間（另一放盤）。」被買家鋤價，無奈、爆粗，他坦言：「銀行估價都539至555萬元，咁咪仲低過市價，無差到咁㗎！當時咁多人問價，我覺得我單位有人搶，坊間好多人搵600萬元以下嘅樓，我層樓係有價值！」

他篤信命理，於是本報邀請幾年前為他批命的玄學家麥玲玲再屈指一算，麥玲玲批他，2018年內賣樓成事機會高，八字而言，他出生日屬丙辰日，2018年是戊戍年，辰戍相沖，屬天羅地網相沖，沖土，屬物業買賣的時機。見完麥玲玲，尤如注入強心針，「玲玲師傅話一定成功，個心好定。而且就算賣唔出，我都唔怕，樓係有價值。有諗過唔賣，因為就算收租都得，有人幫我供樓，完全無負擔，我做乜要咁賤賣咗層樓。」

心情平復後，揸車搵食的他兩日後撞車，「痴線，俾人架車打橫隊埋嚟！」當時樓價持續下跌，想賣樓又賣不出，自僱司機手停口停。竟然當天傳來有客還價545萬元的消息，貼近目標價550萬元，「如果係有心會落票，唔講價，就呢口價。」谷底反彈？相約客人9月9日簽約，當天早上買家說有事做而改晚上7時，臨簽約前，Tony無奈稱：「啱啱傾好晒價錢，今日入票。臨尾40分鐘，個客話其他代理平啲……無嚟到，放咗我飛機，成件事無咗！」

後來經紀致電給他說：「個客話搵另一間代理行去買你個單位只係530萬元喎！」Tony聽完即爆粗，「我一直無講過呢口價，底線係550萬元，甚至無講過可以540幾萬元。」發完脾氣，諗一諗，「無計，人哋講咩控制唔到。經紀爭生意，對方想留住個客。但我覺得個客傻，我係業主，我話幾多就幾多，唔係經紀話幾多就幾多。」

怒火中燒，這邊廂被放飛機，不夠一小時，隨即傳來另一個經紀的電話：「我客人開價530萬元，有無得傾？」Tony當時覆：「死都唔制，原本有人出545萬元，有咩理由要平15萬元，我話最少550萬元。」但這名客人肯追價，先追一口533萬元，但Tony堅持540萬元或以上，談判膠着，經紀約雙方9月10日到分行傾。

相約會面前一晚，Tony坦言：「嗰晚諗好多嘢，最驚就係放飛機。」

昔日買樓　親友說戇居

Tony賣樓諸事不順，吊高賣樓吊不到，叫價回歸現實又被鋤價，然後撞車斷衣食，到有客叫價達到目標價最終竟又放飛機。憤怒、失望，最終選擇平常心。見客肯追價，估計是有心人，一於9月10日去相見。查實客人追價533萬元，與他目標價550萬元相差17萬元或3%。他比準買家早到經紀行，心態都放軟，「我都由550萬元減到540幾萬元，541至543萬元都可以接受。我諗落得去，買家都肯加少少，我又肯減少少，機會都大。」

進入代理行，他和準買家被各自經紀帶到不同房間，「兩邊經紀唔知講咩。總之就開口價、還口價。買家還一口價538萬元，我覺得都好貼價啦！對方經紀問我底價究竟多少？我答542萬元，實價，無得減。跟住對方經紀說無問題，成交！」全程20分鐘，單位以542萬元成交，較2015年買入價382萬元，賬面賺160萬元，單位升值42%。

「唉！終於賣出，簽約收票，唔使煩。但唔開心，因為睇見經紀行貼其他屋苑啲樓價，睇到新都城300幾呎都賣638萬元，都會駅個單位同我個單位一樣大，講緊790萬元。賣咗樓，我日後點樣再入市？揸住舊錢買唔到其他樓，心諗，我點解要賣樓？」問他是否後悔？他回應：「唔係後悔，係唔開心，唔會話：『好嘢賣咗，我賺錢啦！』，反而諗我幾時可以買番好啲嘅地方。」記得當年買樓，親戚話：「你咪傻㗎，呢個時候買樓？輸死你呀！」又有朋友說他戇居，「呢個朋友有錢唔買樓，租樓租咗5年，月租萬幾蚊，租到而家都係買唔到樓，但而家佢已經喺瀨晒嘢！」賣樓後他曾有隔山買牛的衝動，曾到烏克蘭等地視察，最後放棄咗，「我諗點解樓價咁低都無人買呢？總有原因，可能升得慢或政治社會環境唔穩定。」

成交期3個月，篤定今年1月完成交易的Tony一直心想買家撻定就好了，即使最後收票當日他接受訪問仍想：「我想佢撻定呀！賣咗層樓後，睇番啲樓價都唔係跌得好犀利，想搵另一間，發覺有少少困難，啲樓價好癲囉！買個普通500呎單位，近地鐵站嘅私樓都係600萬，根本已經係好難入番市呀！」

土地註冊處資料顯示，Tony沽出將軍澳康盛花園單位後至今，再有7宗成交，6個單位成交呎價都比他沽出單位為低，只有1宗成交呎價比他單位貴3.7%，而該單位位處極高層。「賣樓時，好多筍盤，個價跌緊，但成交期太耐，去到今年1月，中間呢段時間，樓市已經回升番好多。感覺想買番一啲區域好少少嘅地方都比較難。」已經想上番車？「絕對啦！我見樓市又唔係跌得好勁，覺得年尾一定會跌喎！樓價唔會跌咁少。」

「有錢唔買樓係戇居」預留兩球重新上車

賣樓後，他感受到：「香港嘅有錢人好多，好多人揸住舊錢，覺得樓價貴唔買住，當樓價跌咗少少就瘋狂入市。有經紀同我講話去年12月到今年1月將軍澳區已經有100單成交。嘩！初時我賣樓，可能一個月得幾單成交，而家成百單成交。」

他強調無後悔，「始終有賺吖嘛！升跌唔係重點，重點係我會搵樓。我擔心買唔返㗎，擔心買唔返我想買嘅地方囉！即係近地鐵站或私樓，但私樓可以唔洗睇，三、四百呎已600萬，仲要比4成首期，月供萬六、七蚊，太誇張！」重申自己不是落錯車，變現後一直物色其他物業，目標是鄰近地鐵站私樓，睇過新盤如大埔天鑽、紅磡啟岸、二手樓如嘉湖山莊等。

他認為：「有錢唔買樓係戇居！我都會買番，但都要啱先得，唔係求其。當初買康盛花園係求其，但當時選擇唔多，亦都係唯一地方啱預算，完全接受到。」目前目標是400多萬元實用約500呎單位，預留約240萬元重新上車，「而家可能會忟啲，但我會等吓。（你知現在機會不高？）唔覺，總有機會去到呢個價錢，樓市唔合理，再升都唔會超誇張。」

夾錢做飲食生意 「攞個經驗」

未上番車，花數萬元與朋友夾錢在旺角做飲食生意，開業初期以三餸飯形式經營，「你話要賺大錢，我覺得真喺窄窄哋！但又唔覺倒錢落海，經驗嚟㗎嘛 ，其實而家攞好少錢出嚟。幾多人想試就做到，又唔係講緊幾十萬，用啲啲錢，咁點解唔試？做老闆係我其中一個心願，咁我試下不如畀少少錢出嚟攞個經驗啦！就算輸咗都唔係啲乜嘢。」然而餐廳開業未夠一個月，已轉型做小食如串燒，目前處於轉型初期。

記者：陳家雄