新年快樂！足大家今年事事順境！

講返今個新年，筆者見到好多親朋戚友，大家問了好多買樓、租樓意見之餘，亦都同筆者分享了很多匪夷所思的事件，其中一件，就是與抽居屋有關，聽完之後，筆者笑到收唔到聲，但如果我係事主，相信會係喊到收唔到聲。

是咁的！話說筆者身邊都有一班三十多歲的「不婚人士」，他們賺的錢不算多，亦不算太過少，但就是無首期買樓，所以抽居屋似乎成為他們上車的唯一出路。不過人人都知，單身人士配額長期不足，抽得到仲緊要過中六合彩。

就在新年期間，一班親戚就在討論新一批居屋好唔好，邊個盤前景最好，忽然間表姐講了一句：我個朋友之前抽到單身人士一號籌，但係都買唔到！大家自然覺得好奇，點解一號籌都買唔到呢？表姐就話：因為佢budget有限，剩係買到細單位，但係之前的家庭客已經買曬所有細單位，到單身時只有大單位可以買，所以咪買唔到囉！

對唔住啊！表姐個朋友！我知你咁慘我唔應該笑你！但我真係笑咗！因為係人都知，單身人士抽中居屋係一件有幾難的事，好似剛剛對上一次推售居屋，超過10萬個申請中，就有接近6萬個係單身人士身份申請，但分配予綠白兩表單身人士的可售單位，僅共100個，咁都抽到1號籌，你話係幾好彩呢。

好！笑完之後，講真，筆者都未抽過居屋，好多細節都未必夠一般參與者清楚，於是上網研究下到底係點運作啦，原來，新居屋的揀樓次序，是在家庭申請者選樓後，一人申請者才可以選購餘下的任何單位，而無論是家庭客或單身人士，都無規定他們選哪一類單位。

雖然，理論上，家庭客人數多，應該買大單位的機會大，到單身人士揀樓，都可以買到細單位，不過，新居屋與市價掛勾，就算打個七折，整體樓市上漲下，居屋售價都水漲船高，以最新一批居屋為例，啟德及長沙灣兩個屋苑呎價都接近一萬元，故此，部份家庭客負擔不起較大的單位，唯有退而求其次，購買細單位，情況同私樓市場一樣。結果輪到單身人士揀樓，細單位已經無貨，而單身人士更難支付大單位的價錢，才出現1號籌都買唔到樓的慘況。

=========

文：Purple弟弟

公屋富戶政策上年10月1日已經生效，筆者同家人一直都過住樸素節儉嘅生活，心諗同「富戶」理應扯不上任何關係，於是一直都無留意個政策實際內容係啲咩。

直至最近，屋企人同我講，原來我哋屋企竟然係富戶，如果今年4月審查過唔到，就要遷出現有公屋單位。

公屋富戶:224萬買唔到三人單位

咁我知道咗之後，即刻上網睇睇呢條例究竟係咩料子！原來三人家庭資產超224萬元就叫富戶，換轉喺其他地方，224萬元可以叫做好使好用，但呢度係香港！呢224萬都係我同屋企人工作多年嚟死慳死抵兼投資有少許回報嘅成果。如果我哋一家人被踢出公屋，用呢224萬最多都係買到一個150－200呎單位，點住三個人！

公屋富戶:綠表無著數

退一步，反正層公屋都要畀返人，抽綠表又如何？抽中雖然可以豁免壓力測試，但係個單位係清水樓，裝修費都一筆，仲交管理費！最大問題係香港樓價日日升，供私人樓都叫有得享受升幅回報，綠表居屋冇得出租，升值只是紙上富貴，唔關我事，咁我點解唔住返公屋。

公屋富戶:人工太低過唔到壓力測試

好啦我當呢224萬元畀做首期去私人市場，想買個400呎單位已經唔洗諗，因為實用面積350呎多少少已經叫價接近400萬，以我人工＄15,000嚟計，連壓力測試都過唔到！剩低唯一解決方法就係父母除我名，自己出去租又好，搵朋友屈蛇又好，瞓街都好…總之就要自己死掂佢啦。

喺香港想向上流真係好難，當你儲到少少錢果陣，仲要畀人逼出去租屋燒曬你筆錢，你話心唔心嗡！如果唔係一下子中六合彩，都無乜機會可以住到一個居住面積合理少少嘅地方。