每週指數巡禮（22）悶戰一場 2014月1月27日 |
|
我記得以前聽香港電台講波，那個外號大聲公的評述員，當時叫講波佬，他可以將一場悶到發慌的比賽講到天花龍鳳，不過後來得罪了當時差佬，冇得講，話說有一場波，快翼莫振華好似食咗過期藥物一樣，話過就過，話走就走，你估大聲公點講，佢話莫振華當日的表現，對方冇一個後衛可以嘜住，好似的差佬食完嘢一樣，唔使俾錢，話走就走，他這樣說，莫講當日，就算是今日都冇得講，所以，我一早有心理準備，成日得罪人，分分鐘冇得寫，不過冇所謂，就當退休。
在近幾年樓價，一直都是一場攻防戰，政府與那些學術界人士主攻，他們從某些地方得來數據斷定樓價會下跌三成甚至一半以上，政府最茅，達唔到預期目標就出招，當然，口號一定是慷慨激昂，說什麼高樓價影響低收入的市民置業，她又唔想一想，若果沒有高樓價，那些稅收又從何而來，現在打完齋唔要和尚，一定要樓價下跌，而那些股票評論員就希望市民最好賣咗層樓，全部錢走去炒股票，不過，在過年兩年，樓市在如此龐大壓力下，與股市亦只不過是叮噹馬頭，大家均有升幅，樓市輸一個馬鼻，今年，九成幾專家都預測股市上升，樓市大跌，不過至今兩者均有跌幅，股市比樓市的跌幅高達一倍，那些專家全部跌眼鏡，不過，一年咁長，結果是怎樣現在是太早判斷，至於做防守的小業主，別無他求，只要樓價不大跌便可以，否則，銀行要追收差額，都唔知點樣應付，不過，樓價又千祈唔好上升，若果再升，政府又有藉口出招打壓，脆弱樓市未必可以承受得來，所以，小業主們一於死守，不買不賣，享受低息帶來額外收入，試問如此情況，點會不是悶戰一場，不過，這是小業主的最高戰術，若果大家聽那些專家預測，一齊將手上的物業出售，到那時候，樓價怎能不大跌，防守，是唯一戰略，只要守得上兩年以上，政府出現巨額財赤，不撤招也不可能，到時才伺機反攻，勝算在握。
上星期五，指數出乎意料升了0.49，報118.2，與22個星期前每週指數巡禮開始的時候下跌了1.6，當時是119.8，跌幅不足2％，雖然，有專家已經改口，說樓價會超過兩年，甚至四年才會下跌一半，不過，每週指數巡禮就唔改，到時一定要做一次結算，否則，現在又搬龍門，小業主所作的防守是白費，唔知道大家同唔同意。