明水，暗水，乜水 2014月1月8日 |
|
又有老友打電話給我，問我知不知道周顯是乜水，因為，最近他睇報紙，見周顯講明水，暗水，睇到佢一頭霧水，仲有，佢阿媽托佢問我，周顯與周世顯有什麼關係，是不是周顯是周世顯個仔，咁奇怪問題，上了年紀女人，唔通個個都鍾意周世顯，他只不過是唐滌生虛構的人物，就算真的有其人，都會是周顯係周世顯老竇，好似楊成與楊受成一樣，我講了一大輪，我老友問，究竟周世顯是誰，我回答，就是在「帝女花」劇中，與長平公主一齊飲毒酒個果駙馬爺，不過，我相信是唐滌生老作，而梁羽生就話長平公主被佢阿爸，即是明朝最後一個皇帝，崇禎，斬了一隻手，變成獨臂神尼，我相信梁羽生都是老作，其實，當李自成攻陷北京之後，將崇禎那些妃嬪，宮女配給手上將領，而長平公主近身姓費，在洞房花燭當晚殺了李自成一員大將，闖王一怒之下，將所有宮女，妃嬪處死，不過，我唔知道長平公主是否包括在內，我唔係老作，唔信，可以讀一讀唔知邊個寫的「費宮人傳」，我老友聽完之後自言自語，仲難明過周顯講樓，我俾佢吹脹，side我心機。
有一次我問周顯，你自稱大師，唔怕有人笑那個經濟學家咁樣笑你，周顯話，怕什麼，我只不過是大言不慚的師兄，我心想，咁都得，條友轉數咁快，把口仲快過個腦，冇必要都唔好鬥咀，輸梗，但是他的地產理論，我與我的網友一樣，都是唔明，他所講的明水，暗水，理論是有的，但是他暫時仍未融會貫通，或者，有一晚他瞓唔著，唔覺意睇到明水，暗水，於是寫了一篇文章，睇到大家一頭霧水，不過，我唔會話周顯錯，因為我如果咁講，他一定會寫十篇文章反駁，死都俾佢拗番生，又係輸梗。
周顯講得冇錯，買樓收租，尤其那些買豪宅收租的人真的是相當蠢，除了回報低之外，一般租約是十二加二，即是過了一年之後，租客給予業主兩個月通知就可以退租，業主當然沒有此權利，而且，第二年租金與第一年一樣，若果租金上升，蝕底個果當然是業主，不過，這樣還好，倘若租金下跌，租客又話要搬走，最少都會要求減租，好彩，絕大部分豪宅租客都是謙謙君子，上述的事情很少發生，就算是如此，當舊租客搬走之後，業主一定要花一大筆裝修費才可以再租出，今次，我相信周顯與我有同一結論，就是千祈唔好買豪宅收租。